Sumqayıtda çörək daşıyan maşınlar xəstəlik yayır


Sumqayıtda sexdə bişən çörək antisanitariya şəraitində daşınır.

Azadpress.az xəbər verir ki,bu haqda Sumqayıt şəhər sakini Nicat Nəsirli facebookda məlumat yayıb:

"Bu fotoları səhər saatlarında Sumqayıt avtovağzalının yanında çəkmişəm. Qaynar-qaynar alıb evə apardığımız çörək adlı neməti bir sıra əldəqayırma sexlər belə daşıyıb bizə yedirdirlər.Sürücünün sağında yerləşən oturacağın üstünə, ayaqaltına yığılaraq daşınan bu çörəklər vərəm kimi bir çox yolxucu xəstəliklərin mənbəyidir. Hələ üstəgəl, onu bişirənin, daşıyanın, satanın sağlamlığı haqda heç bir məlumatımız yoxdur. Mağazalarda çörəklərin yığıldığı rəflərə fikir verin, antisanitariya baş alıb gedir. Açıq şəkildə əldən-ələ keçərək evlərimizə yol tapan bu "zavod çörək"ləri bizi qidalandırmır, "öldürür". Amma bu işdə bizimdə günahımız var. Belə hallara qarşı ictimai etirazın, qınağın olması çox vacibdir. Qablaşdırılmamış çörəkdən istifadəni azaltmaq, gigiyenik baxımdan qorunan çörəklərdən istifadəyə etmək lazımdır. Qoy vətəndaşına hörmət edən sahibkar daha çox qazansın!"

Televizizya əməkdaşı olan Nəsirlinin dediyinə görə,belə çörəklər insanlarda müxtəlif xəstəliklər yaradır: "Son illər ölkəmizdə çörək sənayesi xeyli inkişaf edib, müasirləşib. Rəflərimizə yeni qablaşdırılmış, gigiyenik çörək çeşidləri daxil olub. Amma müşahidəmə görə, əhalidə açıq, özüdə qaynar çörəyə maraq daha böyükdür. Axşamlar rəflərdə qablaşdırılmış çörəklər tökülüb qalır. Satıcılarda etiraf edirlər ki, açıq çörəklər daha çox alınır. Çoxu hesab edir ki, qablaşdırılmış çörək alanda çəkidə və qiymətdə itirir. Bu düzdü, bəs sağlamlığımızın qiyməti neçəyədir? Sonra həkimlərə xərclənən pulları, vaxtı, əsəbi hesablayan varmı? Hər bir vətəndaşı bu sahədə ictimai həssaslığa çağırıram. Müasir çörək zavodlarımız da dövlət qurumları ilə birgə maarifləndirmə təşəbbüslərini artırmalıdırlar. Gəlin sağlamlığımızı qoruyaq!"


Saytdakı materiallardan istifadə edərkən istinad etmək vacibdir.